من حكايا أبو عبد البيروتي:
أبو العبد راح يقصّ شعرو عند حلاّق جديد، وحبّ يفتح معو حديث عن الأوضاع العامّة بالبلد.
أبو العبد: سمعت التصريحات الأخيرة لرئيس الوزراء مبارح؟
الحلّاق: أرجوك يا أبو العبد، ما تحكي سياسة بالمحلّ..
أبو العبد: طيّب.. شو أخبار الدولار اليوم؟
الحلاّق: أرجوك يا أبو العبد ما تجيب سيرة الدّولار بالمحلّ..
أبو العبد: برأيك الوضع الاقتصادي بالبلد عم يتحسّن؟
الحلّاق: أرجوك ما تجيب على لسانك سيرة الاقتصاد بالمحلّ..
أبو العبد: عندك خبر عن وضع البنزين، والمازوت، والكهربا بالبلد؟
الحلّاق: برحمة والديك يا "ابو العبد"، ما تجيب سيرة الكهربا والبنزين.. ما ناقصنا سين وجيم...
أبو العبد: شو رأيك.. القضاة رح يرجعوا عن اعتكافن؟
الحلّاق: دخيلك يا "أبو عبد" ما بدّنا نجيب سيرة العدليّة.
أبو العبد: طيّب رح ينتخبوا رئيس جمهوريّة؟
الحلّاق: بلا هالحكي دخيلك، هاي قضيّة دوليّة.
أبو العبد: طيّب يا معلّم، ممكن نحكي كلام عن النسوان ؟
الحلّاق: طبعًا أكيد...
أبو العبد: هلّأ أمّك جابتك طبيعي ولّا شقّ بطن؟
الحلّاق: أكيد طبيعي، هيّي قالتلي.
أبو العبد: لا ما بظنّ هيك، مبيّن جايبتك سيزريان!
لأنّك يا طرمان مبيّن عليك ومن كلامك، إنّك غفلان.. ومش دريان!
والله يعين اللي عايش بلبنان...
